പാലക്കാട്: അട്ടപ്പാടിയിൽ വീണ്ടും വൻ കഞ്ചാവ് വേട്ട. 7,300 കഞ്ചാവ് ചെടികളാണ് കണ്ടെത്തി നശിപ്പിച്ചിരിക്കുന്നത്. പുതൂർ പഞ്ചായത്തിലെ പൊന്നക്കൽ മലയിൽ രണ്ടിടങ്ങളിലായിരുന്നു കഞ്ചാവ് കൃഷി. ഏഴ് മണിക്കൂറിലധികം സാഹസികമായി ചെങ്കുത്തായ മലകളിലൂടെ യാത്ര ചെയ്ത് എത്തിയാണ് പൊലീസ് സംഘം കഞ്ചാവ് ചെടികൾ നശിപ്പിച്ചത്.

പുതൂർ പഞ്ചായത്തിലെ പൊന്നക്കൽ മലയ്ക്കും അംഗണ്യൻ ചോലയ്ക്കും ഇടയിലായി 160 തടങ്ങളിലായി ഒന്നര മാസം പ്രായമായ 1600 ഓളം കഞ്ചാവ് തൈകൾ കണ്ടെത്തി. പൊന്നക്കൽ മലയുടെ കിഴക്ക് വശത്തായി 475 തടങ്ങളിലായി പൂർണ വളർച്ച എത്തിയതും പൂത്ത് നിൽക്കുന്നതുമായതുമായ 5700 കഞ്ചാവ് തൈകളും കണ്ടെത്തി. ഇവയെല്ലാം നശിപ്പിച്ചു.

ട്രിപ്പ് ഇറിഗേഷൻ നടത്തിയാണ് കഞ്ചാവ് ചെടികൾ നട്ടുവളർത്തിയിരുന്നത്. കഞ്ചാവ് തൈകൾ നട്ടുവളർത്തിയവരെ പിടികൂടാൻ പുതൂർ പൊലീസ് അന്വേഷണം ഊർജ്ജിതമാക്കി.