തിരുവനന്തപുരം: സംസ്ഥാനത്ത് അത്യാധുനിക സ്മാർട്ട് പി.ഡി.എസ് പദ്ധതി നടപ്പിലാക്കുന്നതിന്റെ ഭാഗമായി തുടർച്ചയായി ആറുമാസം റേഷൻ വിഹിതം കൈപ്പറ്റാത്ത കാർഡുകൾ ഡീആക്ടിവേറ്റ് ചെയ്യാൻ പൊതുവിതരണ വകുപ്പ് തീരുമാനിച്ചു. ഇത്തരം കാർഡുകളെ ‘സൈലന്റ് റേഷൻ കാർഡുകൾ’ ആയി തരംതിരിച്ചാണ് തുടർ നടപടികളിലേക്ക് കടക്കുന്നത്. എല്ലാ മാസവും 21-ാം തീയതി പരിശോധന നടത്തി ഇത്തരം നിഷ്ക്രിയ കാർഡുകൾ കണ്ടെത്തുകയും, തുടർന്നുള്ള മാസത്തെ ഒന്നാം തീയതി മുതൽ റേഷൻ വിഹിതം ലഭിക്കാത്ത വിധത്തിൽ ഇവ താൽക്കാലികമായി ഡീആക്ടിവേറ്റ് ചെയ്യുകയും ചെയ്യും.
ഡീആക്ടിവേറ്റ് ചെയ്യപ്പെടുന്ന റേഷൻ കാർഡുകൾ വീണ്ടും പ്രവർത്തനക്ഷമമാക്കണമെങ്കിൽ കർശന ഉപാധികളാണ് വകുപ്പ് മുന്നോട്ടുവെക്കുന്നത്. കാർഡിൽ പേരുള്ള മുഴുവൻ ഗുണഭോക്താക്കളും മൂന്ന് മാസത്തിനകം ഇ-കെവൈസി നടപടികൾ പൂർത്തിയാക്കിയാൽ മാത്രമേ കാർഡ് വീണ്ടും ആക്ടിവേറ്റ് ചെയ്തു നൽകുകയുള്ളൂ. അനുവദിച്ചിട്ടുള്ള മൂന്ന് മാസത്തെ സമയപരിധിക്കുള്ളിൽ ഇ-കെവൈസി പൂർത്തിയാക്കാത്ത റേഷൻ കാർഡുകൾ അസാധുവാക്കി പൊതുവിതരണ വകുപ്പിന്റെ ഡാറ്റാബേസിൽ നിന്ന് എന്നെന്നേക്കുമായി നീക്കം ചെയ്യും.
കൂടാതെ, തിരിച്ചറിയൽ രേഖകൾ അടിസ്ഥാനമാക്കിയുള്ള ആധാർ പരിശോധനയിൽ ഒന്നിലധികം റേഷൻ കാർഡുകളിൽ ഉൾപ്പെട്ടിട്ടുള്ളതായി കണ്ടെത്തുന്ന ഗുണഭോക്താക്കളെയും ഉടനടി ഡീആക്ടിവേറ്റ് ചെയ്യും. ഇത്തരക്കാർ മൂന്ന് മാസത്തിനകം നിർബന്ധമായും ഇ-കെവൈസി പരിശോധന പൂർത്തിയാക്കുകയും, തങ്ങൾക്ക് നിലനിർത്തേണ്ട കാർഡ് ഏതാണെന്ന് തെരഞ്ഞെടുത്ത് മറ്റ് കാർഡുകളിൽ നിന്ന് പേരുകൾ ഔദ്യോഗികമായി ഒഴിവാക്കുകയും വേണം. ഈ പരിശോധനകൾ പൂർത്തിയാക്കിയ ശേഷം മാത്രമേ ഇവർക്ക് വീണ്ടും റേഷൻ വിഹിതം അനുവദിക്കുകയുള്ളൂ. സമയപരിധിക്കുള്ളിൽ തെറ്റുകൾ തിരുത്താത്തവരുടെ വിവരങ്ങൾ സർക്കാർ ഡാറ്റാബേസിൽ നിന്ന് നീക്കം ചെയ്യും. സംസ്ഥാനത്ത് സ്മാർട്ട് പി.ഡി.എസ് പദ്ധതി പൂർണ്ണതോതിൽ നടപ്പാക്കുന്ന വേളയിൽ ഇതുമായി ബന്ധപ്പെട്ട വിശദമായ വിവരങ്ങൾ പൊതുജനങ്ങളെ അറിയിക്കുമെന്ന് പൊതുവിതരണ ഉപഭോക്തൃകാര്യ കമ്മീഷണർ വ്യക്തമാക്കി.
