തിരുവനന്തപുരം : പ്രണയാഭ്യർത്ഥന നിരസിച്ചതിന് പതിനാറുകാരിക്ക് മർദ്ദനം. വർക്കലയിൽ യുവാവ് പിടിയിൽ. വെട്ടൂർ സ്വദേശി കൃഷ്ണ രാജ് (24) ആണ് പിടിയിലായത്. വിദ്യാർത്ഥിനിയെ പിന്തുടർന്നെത്തി മർദ്ദിച്ചതിന് പോക്സോ പ്രകാരമാണ് ഇയാൾക്കെതിരെ കേസെടുത്തിരിക്കുന്നത്.

ട്യൂട്ടോറിയൽ കോളേജിൽ 10ാം ക്ലാസിൽ പഠിക്കുന്ന പെൺകുട്ടി ക്ലാസിന് പോകുംവഴി യുവാവ് നിരന്തരം പ്രണയാഭ്യർത്ഥന നടത്തിയിരുന്നു. ഇന്നലെ ട്യൂട്ടോറിയലിലേക്ക് പോകും വഴി ബസിൽ വച്ചും വീണ്ടും ശല്യം ചെയ്തു. പിന്നീട് ബസിൽ നിന്ന് ഇറങ്ങിയപ്പോൾ അവിടെ നടുറോഡിൽ വച്ച് മുടിയിൽ കുത്തിപ്പിടിച്ച് മുഖത്തടിച്ചുവെന്നാണ് പരാതി. ഈ അടിയിൽ പെൺകുട്ടി നിലത്ത് വീണു.

പെൺകുട്ടിയുടെ പരിക്ക് ഗുരുതരമല്ല. വാദ്യകലാകാരനായ യുവാവ് നിരന്തരമായി ശല്യം ചെയ്തിരുന്നതായി പൊലീസും പറയുന്നുണ്ട്. അറസ്റ്റിലായ ഇയാളെ കോടതിയിൽ ഹാജരാക്കി റിമാന്റ് ചെയ്യും.