ദുബൈ: തൊഴില്, റസിഡന്സ്, സന്ദര്ശക വിസകള് വാഗ്ദാനം ചെയ്ത് പണം തട്ടുന്ന വ്യാജ പരസ്യങ്ങള്ക്കെതിരെ ജാഗ്രത പാലിക്കണമെന്നു ദുബൈ പൊലീസിന്റെ മുന്നറിയിപ്പ്. സമൂഹ മാധ്യമങ്ങളിലൂടെയും ആപ്പുകളിലൂടെയുമാണു തട്ടിപ്പുകാര് ജനങ്ങളെ വലയിലാക്കുന്നത്.
ലൈസന്സില്ലാത്ത സ്ഥാപനങ്ങളുടെ പേരിലോ സര്ക്കാര് സ്ഥാപനങ്ങളാണെന്ന വ്യാജേനയോ പണം തട്ടാനുള്ള ശ്രമങ്ങളാണു നടക്കുന്നതെന്നു ക്രിമിനല് ഇന്വെസ്റ്റിഗേഷന് ജനറല് ഡിപ്പാര്ട്ട്മെന്റിലെ ആന്റി ഫ്രോഡ് സെന്റര് വ്യക്തമാക്കി. ബന്ധപ്പെട്ട സര്ക്കാര് സ്ഥാപനങ്ങള് വഴിയോ അംഗീകൃത സേവനദാതാക്കള് വഴിയോ മാത്രമേ വിസ നടപടികള് പൂര്ത്തിയാക്കാവൂ എന്നും വിശ്വാസ്യയോഗ്യമല്ലാത്ത ഇടനിലക്കാരെ ഒഴിവാക്കണമെന്നും അധികൃതര് നിര്ദേശിച്ചു.
പണം കൈമാറുന്നതിനു മുന്പു വിസ ഓഫറുകളുടെ ആധികാരികത ഔദ്യോഗിക മാര്ഗങ്ങളിലൂടെ പരിശോധിക്കണമെന്നും വ്യാജ ജോലി, വിസ വാഗ്ദാനങ്ങളില് വീഴരുതെന്നും മുന്നറിയിപ്പില് പറയുന്നു.
