ആഭരണം എന്നതിനേക്കാളുപരി ഒരു സുരക്ഷിത നിക്ഷേപ മാര്‍ഗമായാണ് സ്വര്‍ണത്തെ എല്ലാവരും കണക്കാക്കുന്നത്. അതിനാല്‍ തന്നെ സ്വര്‍ണ വിലയിലെ മാറ്റങ്ങളെ സാകൂതം വീക്ഷിക്കുന്നവരാണ് നമ്മളില്‍ പലരും. എന്നാല്‍ അടുത്ത കാലത്തായി സാധാരണക്കാരെ സംബന്ധിച്ച് അത്ര നല്ല വാര്‍ത്തയല്ല സ്വര്‍ണ വിപണിയില്‍ നിന്ന് കേള്‍ക്കുന്നത്. ദിനംപ്രതി പുതിയ റെക്കോഡുകള്‍ തേടി കുതിക്കുകയാണ് സ്വര്‍ണത്തിന്റെ വില.

തുടര്‍ച്ചയായ വില വര്‍ധനവിന് പിന്നാലെ സ്വര്‍ണ വിലയില്‍ ഇടിവ് കണ്ട ദിനമായിരുന്നു ഇന്നലെ. മിനിയാന്ന് 58720 രൂപയായിരുന്ന പവന്‍വില ഇന്നലെ 58280 യിലേക്ക് എത്തിയിരുന്നു. എന്നാല്‍ ഇന്ന് വീണ്ടും തിരിച്ചുകയറിയിരിക്കുകയാണ് സ്വര്‍ണവില. ഇന്ന് ഒരു ഗ്രാം സ്വര്‍ണത്തിന് 10 രൂപയാണ് കൂടിയിരിക്കുന്നത്. ഒരു പവന്‍ സ്വര്‍ണത്തിന് ഇന്ന് 80 രൂപയും വര്‍ധിച്ചിട്ടുണ്ട്. ഇതോടെ ഇന്ന് ഒരു ഗ്രാം പൊന്ന് വാങ്ങാന്‍ 7295 രൂപ കൊടുക്കണം.