പച്ചപ്പുതച്ച മൊട്ടക്കുന്നുകൾ, പച്ചക്കടൽ പോലെ പരന്നുകിടക്കുന്ന തേയിലച്ചെരുവുകൾ, വിദൂര കാഴ്ചകളെ പൂർണ്ണമായി മറച്ച് പെട്ടെന്ന് ഉയർന്നുപൊങ്ങുന്ന കനത്ത കോടമഞ്ഞ്. സഞ്ചാരികളുടെ മനസ്സിലേക്ക് വാഗമൺ എന്ന പേര് കേൾക്കുമ്പോൾ തന്നെ ആദ്യം ഓടിയെത്തുന്ന ദൃശ്യങ്ങളാണിവ. ഏതൊരു കാലാവസ്ഥയിലും സഞ്ചാരികൾക്ക് എപ്പോഴും പ്രിയപ്പെട്ട സൂപ്പർ സ്റ്റാർ ആണ് വാഗമൺ.
സാധാരണയായി മൺസൂൺ കാലങ്ങളിൽ ഇടുക്കിയിലെ ഉയർന്ന മലയോര മേഖലകളിലേക്ക് സഞ്ചാരികളുടെ വരവ് ഗണ്യമായി കുറയാറാണ് പതിവ്.ഉരുൾപൊട്ടൽ ഭീഷണികളും യാത്രാ തടസ്സങ്ങളും ഭയന്ന് പലരും മലയോര പാതകൾ ഒഴിവാക്കും. എന്നാൽ ഇത്തവണത്തെ മഴക്കാലം ഇടുക്കിയുടെ ടൂറിസം ഭൂപടത്തെ വലിയ മാറ്റങ്ങളോടെയാണ് വരവേൽക്കുന്നത്. പ്രകൃതി ഒരുക്കിയ കനത്ത മഴക്കാഴ്ചകൾ നേരിട്ട് കണ്ട് ആസ്വദിക്കാൻ നിരവധി ആളുകളാണ് ദിവസവും ചുരം കയറി വാഗമണ്ണിലേക്ക് എത്തിച്ചേരുന്നത്. മൺസൂൺ ടൂറിസത്തിൽ ഇടുക്കിയുടെ തിളങ്ങുന്ന നക്ഷത്രമായി വാഗമൺ മാറിക്കഴിഞ്ഞു.
മഴ കനത്തതോടെ വാഗമൺ മലനിരകൾ കൂടുതൽ പച്ചപ്പണിഞ്ഞു കഴിഞ്ഞു. വേനലിൽ ഉണങ്ങി വരണ്ട മൊട്ടക്കുന്നുകൾ പ്രകൃതിയുടെ അനുഗ്രഹത്താൽ കൂടുതൽ സുന്ദരിയായി മാറി. കാട്ടരുവികളും മലയോരങ്ങളിലെ ചെറു വെള്ളച്ചാട്ടങ്ങളും പൂർണ്ണമായി സജീവമായി തുടങ്ങിയതോടെ പ്രകൃതിയുടെ ഭംഗി ഇരട്ടിയാവുകയാണ്. തേയിലത്തോട്ടങ്ങൾക്ക് മുകളിലൂടെ ഒഴുകിനീങ്ങുന്ന കോടമഞ്ഞും ഇലത്തുമ്പുകളിൽ തങ്ങിനിൽക്കുന്ന മഴത്തുള്ളികളും ഇവിടുത്തെ കാഴ്ചകളെ കൂടുതൽ മനോഹരമാക്കുന്നു.
സാഹസിക വിനോദ സഞ്ചാരികൾക്കും കുടുംബമായി വന്ന് ഒഴിവുകാലം മനോഹരമായി ചെലവഴിക്കാൻ ആഗ്രഹിക്കുന്നവർക്കും ഒരുപോലെ പ്രിയങ്കരമാണ് വാഗമൺ എന്നതുതന്നെയാണ് ഇവിടുത്തെ ഏറ്റവും വലിയ പ്രത്യേകത. ഓഫ് റോഡ് ഡ്രൈവിങ്, ട്രെക്കിങ് തുടങ്ങി സഞ്ചാരികളെ ഒരേപോലെ ആകർഷിക്കുന്ന നിരവധി വിനോദ ആക്റ്റിവിറ്റികൾ ഇവിടുത്തെ മലനിരകളിൽ ഒരുക്കിയിട്ടുണ്ട്.
മലനിരകളെ വരിഞ്ഞുമുറുക്കുന്ന മഞ്ഞിൻ കാഴ്ചകൾ കണ്ണുകളിലേക്ക് ആവാഹിക്കാനും, തണുത്ത കാറ്റിനൊപ്പം പെയ്യുന്ന ചാറ്റൽമഴയുടെ സുഖം പൂർണ്ണമായി നുകരാനും നിങ്ങൾ തയ്യാറാണെങ്കിൽ ഈ വാര്ഷിക അവധിക്കാലത്ത് നേരെ വാഗമണ്ണിലേക്ക് വണ്ടിയെടുക്കാം. പ്രകൃതി ഭംഗിയുടെ പുതിയൊരു ലോകം തന്നെയാണ് നിങ്ങളെ കാത്തിരിക്കുന്നത്.
