വനിതകള്ക്ക് സൗജന്യയാത്ര അനുവദിക്കുന്നതിന് മുന്നോടിയായി വനിതാ യാത്രക്കാരുടെ എണ്ണമടക്കമുളള വിവരം ശേഖരിക്കാനുള്ള നീക്കം കെഎസ്ആര്ടിസി തല്ക്കാലം നിര്ത്തിവച്ചു. ടിക്കറ്റ് മെഷീനുകളില് ജെന്ഡര് ടിക്കറ്റ് നടപ്പാക്കാനുള്ള സംവിധാനം പരീക്ഷിക്കുക മാത്രമാണ് ചെയ്തതെന്നും പുതിയ സര്ക്കാര് അധികാരമേറ്റ ശേഷമാകും തുടര്നടപടികളെന്നും സിഎംഡി പ്രമോദ് ശങ്കര് പറഞ്ഞു.
സര്ക്കാരിന്റെ അനുമതി ഇല്ലാതെ യാത്രക്കാരുടെ വ്യക്തിഗത വിവരങ്ങള് ശേഖരിക്കുന്നതിനെതിരെ വിമര്ശനം ഉയര്ന്നതോടെയാണ് സംവിധാനം നിര്ത്തിയത്. വകുപ്പ് മന്ത്രിയില്ലാതെ ഡേറ്റ ശേഖരിക്കാനുള്ള നീക്കം സര്ക്കാരിനെതിരെയുളള നീക്കമായി വ്യാഖ്യാനിക്കപ്പെട്ടതും ഉദ്യോഗസ്ഥരെ സമ്മര്ദ്ദത്തിലാക്കി. ഏത് ആവശ്യത്തിനാണ് വ്യക്തിഗത വിവരങ്ങള് ശേഖരിക്കുന്നതെന്ന് വ്യക്തമാക്കാത്ത സര്ക്കുലര് കോടതിയില് ചോദ്യം ചെയ്യപ്പെടാമെന്നതും തീരുമാനം പിന്വലിക്കാന് കാരണമായി.
ഡിജിറ്റല് വ്യക്തിവിവര സുരക്ഷ നിയമം അനുസരിച്ച് ഏതൊരു വിവരശേഖരണത്തിനും ഉദ്ദേശം, ഉപയോഗം, വിവരങ്ങള് സൂക്ഷിക്കുന്ന കാലാവധി എന്നിവ വ്യക്തമാക്കേണ്ടതുണ്ട്. മേയ് എട്ടിലെ ഉത്തരവില് ഇത്തരം വിവരങ്ങള് ഒന്നും ഉണ്ടായിരുന്നില്ല.
