തിരുവനന്തപുരം: വിഴിഞ്ഞം മുല്ലൂര്‍ സര്‍ക്കാര്‍ കെ വി എല്‍ പിഎസിലെ റുവാനിക്ക് വീടുവച്ചു നല്‍കുമെന്ന മുഖ്യമന്ത്രി വി ഡി സതീശന്‍റെ ഉറപ്പ് യാഥാര്‍ത്ഥ്യമായി. സ്‌നേഹവീടിന്റെ താക്കോല്‍ റുവാനിക്കും കുടുംബത്തിനും മുഖ്യമന്ത്രി കൈമാറി. ‘രാത്രിയില്‍ മഴ പെയ്താല്‍ ഉറങ്ങാനാകുന്നില്ല… അതുകൊണ്ടു പ്രിയ മുഖ്യമന്ത്രി അങ്കിളേ… ഞങ്ങള്‍ക്ക് പുതിയ വീടുവച്ചു തരുമോ… അതില്‍ ഞങ്ങളുറങ്ങാം… ഞാന്‍ വലുതാകുമ്പോള്‍ പൈസ തരാം…’ എന്ന് റിവാനി അഭ്യര്‍ത്ഥിക്കുന്ന വീഡിയോ ജൂണില്‍ മാധ്യമങ്ങളിലൂടെ പുറത്തു വന്നിരുന്നു.
വീഡിയോ ശ്രദ്ധയില്‍പ്പെട്ട മുഖ്യമന്ത്രി റുവാനിയുടെ മാതാവ് പ്രിയങ്കയുടെ ഫോണില്‍ വിളിക്കുകയും വീട് നിര്‍മ്മിച്ചു നല്‍കാമെന്ന ഉറപ്പ് നല്‍കുകയും ചെയ്തിരുന്നു. വിഴിഞ്ഞം മുല്ലൂര്‍ സര്‍ക്കാര്‍ കെ.വി എല്‍.പി.എസിലെ വിദ്യാർഥിനിയാണ് റുവാനി.മുഖ്യമന്ത്രി റുവാനിക്ക് ഉറപ്പു നല്‍കിയതിനു പിന്നാലെയാണ് കൊട്ടാരക്കര ആസ്ഥാനമായുള്ള എം.ജി.എം ഗ്രൂപ്പ് ചെയര്‍മാന്‍ ഡോ. ഗീവര്‍ഗീസ് യോഹന്നാന്‍ വീട് നിർമിക്കാനുള്ള സന്നദ്ധത അറിയിച്ചത്.
മൂന്ന് മാസം കൊണ്ടാണ് വീട് പൂര്‍ത്തീകരിച്ചത്. റുവാനിക്ക് വീട് നിര്‍മ്മിച്ചു നല്‍കാന്‍ തയാറായത് ഉള്‍പ്പെടെയുള്ള എംജിഎം ഗ്രൂപ്പിന്റെ ജീവകാരുണ്യ പ്രവര്‍ത്തനങ്ങളെ മുഖ്യമന്ത്രി അഭിനന്ദിച്ചു. മമ്മൂട്ടിയുടെ കെയര്‍ ആന്‍ഡ് ഷെയര്‍ ഇന്റര്‍നാഷണല്‍ ഫൗണ്ടേഷനുമായി സഹകരിച്ച് നടപ്പാക്കുന്ന വിദ്യാമൃതം പദ്ധതിയില്‍ ഉള്‍പ്പെടുത്തി റുവാനിയുടെ തുടര്‍വിദ്യാഭ്യാസത്തിനുള്ള എല്ലാ സഹായങ്ങളും നല്‍കുമെന്ന് എംജിഎം ഗ്രൂപ്പ് ചെയര്‍മാന്‍ ഡോ. ഗീവര്‍ഗീസ് യോഹന്നാന്‍ അറിയിച്ചു. എംജിഎം സ്‌കൂളില്‍ തുടര്‍പഠനത്തിനുള്ള സൗകര്യവും ഒരുക്കുമെന്നും അദ്ദേഹം വ്യക്തമാക്കി.
