പന്തീരാങ്കാവ് ഗാര്ഹിക പീഡനക്കേസില് പരാതിക്കാരിയായിരുന്ന യുവതിയെ ഗുരുതര പരിക്കുകളോടെ കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചു. ഭര്ത്താവ് രാഹുലാണ് യുവതിയെ ആംബുലന്സില് ആശുപത്രിയില് എത്തിച്ചത്. പന്തീരാങ്കാവിലെ വീട്ടില് വെച്ചും ആശുപത്രിയിലേക്ക് കൊണ്ടുവരും വഴിയും രാഹുല് തന്നെ മര്ദ്ദിച്ചുവെന്നും തനിക്ക് മുറിവേറ്റുവെന്നും യുവതി പൊലീസിന് മൊഴി നല്കി.
തിങ്കളാഴ്ച്ച രാത്രി എട്ടുമണിയോടെ ആണ് യുവതിയെ ആശുപത്രിയിൽ എത്തിച്ചത്. ഭർത്താവ് രാഹുൽ മർധിച്ചുവെന്ന് മൊഴി നൽകിയെങ്കിലും തനിക്ക് പരാതിയില്ലെന്നും അച്ഛനും അമ്മയും വന്നാല് പോകാന് അനുവദിക്കണമെന്നും ആണ് യുവതി പോലീസിനോട് ആവശ്യപ്പെട്ടത്. ഭര്ത്താവിന്റെ വീട്ടില് നിന്നും തന്റെ സര്ട്ടിഫിക്കറ്റ് എടുക്കാന് സഹായിക്കണമെന്നും യുവതി പൊലീസിനോട് ആവശ്യപ്പെട്ടു.
ഏറെ ചർച്ചചെയ്യപ്പെട്ട ഗാർഹിക പീഡനക്കേസായിരുന്നു പന്തീരാങ്കാവ് പീഡനക്കേസ്. രാഹുലിനെതിരെ ഗുരുതര ആരോപണങ്ങൾ ഉന്നയിച്ച യുവതി പിന്നീട് പരാതി പിൻവലിക്കുകയും ഭർത്താവിനൊപ്പം പോവുകയുമായിരുന്നു. പിന്നീട് കേസ് ഹൈക്കോടതി റദ്ദാക്കിയിരുന്നു. രാഹുലിന്റെയും യുവതിയുടേയും സമാധാന ജീവിതത്തിന് കേസ് തടസമാകരുതെന്ന് കാട്ടിയാണ് ഹൈക്കോടതി കേസ് റദ്ദാക്കുമെന്ന് അറിയിച്ചത്. കേസ് റദ്ദാക്കണമെന്നാവശ്യപ്പെട്ട് ഇരുവരും കോടതിയെ സമീപിക്കുകയായിരുന്നു
