നീളം കുറഞ്ഞ് കഴുത്തില്‍ നിന്ന് അല്പം ഇറങ്ങിയാണോ മുടിയുടെ നീളം? എങ്കില്‍ അതി മനോഹരമായ ഹെയര്‍ സ്റ്റൈലുകൾ പരീക്ഷിക്കാന്‍ നിങ്ങള്‍ക്ക് അവസരമുണ്ട്. നീളം കുറഞ്ഞ മുടിയും അതിനോട് ചേര്‍ന്ന വേഷങ്ങളും ധരിയ്ക്കുന്നത് പ്രായം കുറഞ്ഞതായി തോന്നിയ്ക്കുകയും ചെയ്യും. നീളം കുറഞ്ഞ മുടി മനോഹരമായ രീതിയില്‍ സെറ്റ് ചെയ്യുന്നത് നിങ്ങളുടെ മുഖത്തിന്റെ ഭംഗി വര്‍ധിപ്പിക്കാനും ആവശ്യമെങ്കില്‍ കൂടുതല്‍ മുടിയുള്ളതായി തോന്നിപ്പിക്കാനും കഴിയും. എങ്കില്‍ പിന്നെ മുഖത്തിന്‌ ഇണങ്ങിയ ഹെയര്‍ സ്റൈലുകള്‍ തിരഞ്ഞെടുത്ത് പരീക്ഷിക്കാനായി തയ്യാറായിക്കോളൂ.
ഹെയർസ്റ്റൈലുകൾ എങ്ങനെ തിരഞ്ഞെടുക്കാം?
മുഖത്തിന്റെ മനോഹാരിതയും മുടിയുടെ ഭംഗിയും കൂടെ നല്ല രീതിയില്‍ ഇണങ്ങുമ്പോഴാണ്‌ ഒരാളുടെ സൗന്ദര്യം പൂര്‍ണമാകുന്നത്. മുഖം മനോഹരമാണെങ്കിലും ഹെയര്‍ സ്റ്റൈല്‍ നല്ലതല്ലെങ്കില്‍ അത് ഒറ്റ നോട്ടത്തില്‍ തന്നെ അഭംഗിയുണ്ടാക്കും. സ്വന്തം താല്പര്യങ്ങള്‍ മാത്രമല്ല ഇതിന്റെ അടിസ്ഥാനം. ഓരോരുത്തരുടെയും മുഖത്തിനും മുടിയുടെ നീളത്തിനും അനുയോജ്യമായ രീതി കണ്ടെത്തുക എന്നതാണ് പ്രധാനം. ഇതിനായി ചിലപ്പോള്‍ ഹെയര്‍ സ്റ്റൈലിസ്റ്റുകളുടെ സഹായം തേടേണ്ടി വരാറുണ്ട്.
നീളം കുറഞ്ഞ മുടികളില്‍ പരീക്ഷിക്കാവുന്ന ഹെയർസ്റ്റൈലുകൾ:
ബോബ് വിത്ത് ലെയര്‍:
ഈ ഹെയർസ്റ്റൈല്‍ കട്ടി കുറഞ്ഞ മുടിയുള്ളവര്‍ക്ക് പരീക്ഷിക്കാവുന്നതാണ്. കാരണം കൂടുതല്‍ മുടിയുള്ളതായി തോന്നിപ്പിക്കാന്‍ ഈ രീതിയ്ക്ക് കഴിയും. ഇത് മുഖത്തിന്‌ ഭംഗി നല്കുയും ചെയ്യും. ലെയറുകള്‍ താടിയെല്ലുകള്‍ക്ക് കൃത്യമായ രൂപം നല്‍കാനും സഹായിക്കും.
ബോബ് വിത്ത് ലോംഗ് ബാങ്സ് സ്റ്റൈല്‍:
കട്ടിയുള്ള മുടിയുള്ളവരാണെങ്കില്‍ ഈ ഹെയർസ്റ്റൈൽ മികച്ചതാണ്, മുഖത്തിന്റെ വലിപ്പത്തിന് അനുസരിച്ച് മുടിയുടെ അളവ് ക്രമപ്പെടുത്താനും പ്രായം കുറച്ച് തോന്നിപ്പിക്കാനും ഈ രീതി സഹായകമാകും. മുൻവശത്ത് നീളമുള്ള ലെയറുകള്‍ വെട്ടിയിടുന്നതും പിന്നിൽ ക്രോപ്പ് ചെയ്യുന്നതും കൂടുതല്‍ മികച്ചതാക്കും.
ഫെതെര്‍ ബാങ്സ്:
മുടി സ്ട്രൈറ്റ്‌ ചെയ്ത് മനോഹരമാക്കാന്‍ ആഗ്രഹിക്കുന്നവര്‍ക്ക് നന്നായി ഇണങ്ങുന്ന രീതിയാണ് ഫെതെര്‍ ബാങ്സ്. ഇത് മുടിയുടെ ഭാരം കുറച്ചതായി അനുഭവപ്പെടും. കൂടാതെ പതിവ് രീതികളില്‍ നിന്ന് വ്യത്യസ്തമായതിനാല്‍ ഇത് ഏറെ ആകര്‍ഷണീയമായി തോന്നും. ചീകുമ്പോള്‍ ഒരു വശത്തേക്ക് ചേര്‍ത്ത് ചീകുന്നത് കൂടുതല്‍ മനോഹരമാക്കും.
മുടി അലസമായി കിടക്കുന്നതും ചിലപ്പോഴൊക്കെ ഭംഗിയാണ്. അങ്ങനൊരു രീതിയാണ് മുടി നീളത്തില്‍ വെട്ടിയിടുന്നതും അലസമായ രീതിയില്‍ ലെയറുകള്‍ ഉള്ളതും. ഇടത്തരം കട്ടിയുള്ള മുടിയാണെങ്കില്‍ ഈ ഹെയര്‍ സ്റ്റൈല്‍ ഒരു മികച്ച അനുഭവമാകും. മുടിയുടെ ഉള്ളളവ്‌ കൂടിയതായി തോന്നിപ്പിക്കാനും മുടി മനോഹരമായ താളത്തില്‍ ഇളകുന്നതിനും ഈ രീതി സഹായകമാകും. തലമുടിയില്‍ വെറുതെ വിരലുകള്‍ ചലിപ്പിച്ചു കൊണ്ട് നിങ്ങൾക്ക് തന്നെ ഇത് സ്വയം സ്റ്റൈൽ ചെയ്യാൻ സാധിയ്ക്കും. ഈ ലെയറുകൾ നിങ്ങളുടെ കവിൾത്തടങ്ങളും താടിയെല്ലുകളും ഹൈലൈറ്റ് ചെയ്യും.
ഭംഗി കൂട്ടാന്‍ വലിയ ചുരുളുകള്‍:
വലിയ ചുരുളുകള്‍ സെറ്റ് ചെയ്യുന്നത് ഓവൽ ആകൃതിയുള്ള മുഖങ്ങള്‍ ആകർഷകമായി തോന്നാന്‍ സഹായിക്കും. ഇത് താടിയെല്ലുകളും കവിള്‍ത്തടങ്ങളും കൂടുതല്‍ ശ്രദ്ധേയമാക്കാന്‍ സഹായിക്കും. ചുരുളുകള്‍ സെറ്റ് ചെയ്യാനായി സഹായിക്കുന്ന ക്രീമുകളും ആവശ്യമെങ്കില്‍ ഉപയോഗിക്കാം.
മുടി വെട്ടി ഒരുക്കുന്നത് മാത്രമല്ല, മുടിയുടെ നിറത്തിലും അല്പം സ്റ്റൈലിഷ് ആവാം. മുടി ആണെങ്കില്‍ നിറം കറുപ്പ് തന്നെ ആകണമെന്ന നിര്‍ബന്ധമൊന്നും പുതിയ തലമുറയ്ക്ക് ഇല്ല. വ്യത്യസ്തമാകുക എന്നതാണ് പ്രധാനം. നിങ്ങളുടെ മുടിയിഴകളോട് ചേരുന്ന ചില നിറങ്ങള്‍ കൂടി അറിഞ്ഞിരിക്കാം.
തവിട്ട് നിറത്തില്‍ തിളങ്ങുന്ന ഇഴകള്‍:
എല്ലാ പ്രായത്തിലുമുള്ള ആളുകൾക്ക് നന്നായി ഇണങ്ങുന്ന ഹെയർസ്റ്റൈലുകളിൽ ഒന്നാണിത്. ലെയറുകളില്‍ നേര്‍ത്ത തവിട്ടു നിറം വരുന്നത് ഇഴകള്‍ക്ക് ഭംഗി കൂട്ടും. മാത്രമല്ല, മിക്കവാറും എല്ലാ ചർമ്മ ടോണുകളോടും മുഖത്തിന്റെ ആകൃതിയോടും ഈ രീതി യോജിക്കും. ആകർഷകമായ ഹെയർസ്റ്റൈല്‍ ആഗ്രഹിക്കുന്നവര്‍ക്ക് ഇത് പരീക്ഷിയ്ക്കാം.
നീല,പര്‍പ്പിള്‍ മുടിയിഴകള്‍:
ഓളത്തിനൊപ്പം നീങ്ങാന്‍ ആഗ്രഹമില്ലാത്ത ചിലരുണ്ട്. എല്ലാവരും പിന്തുടരുന്ന രീതികളില്‍ ഒന്നും അവര്‍ക്ക് താല്പര്യം കാണില്ല. പകരം, വളരെ വ്യത്യസ്തമായതും മിക്കവരും ചെയ്യാന്‍ മടി കാണിക്കുന്നതുമായ രീതികള്‍ തിരഞ്ഞെടുക്കാനാണ് ഇത്തരക്കാര്‍ക്ക് താല്പര്യം. മുടി മുഴുവന്‍ നീല, പർപ്പിൾ, ഇളം പച്ച പോലുള്ള നിറങ്ങൾ ഉപയോഗിച്ച് മുടിയുടെ സ്വാഭാവിക നിറം പൂര്‍ണമായും മറയ്ക്കും. ഏത് ആള്‍ക്കൂട്ടത്തിലും നിങ്ങളിലേയ്ക്ക് ശ്രദ്ധ കേന്ദ്രീകരിക്കണമെന്നുള്ളവര്‍ക്ക് ഇത്തരം സാഹസികമായ നിറങ്ങള്‍ പരീക്ഷിക്കാം
റോസ് ഗോള്‍ഡ്‌ മുടിയിഴകള്‍:
ജോലി ചെയ്യുന്ന പ്രൊഫഷണലുകൾക്കോ കലാകാരന്മാർക്കോ എല്ലാം ഈ റോസ് ഗോള്‍ഡ്‌ നിറത്തിലുള്ള മുടിയിഴകള്‍ ഇണങ്ങും. ഏത് മേഖലയിലും ഉപയോഗിക്കാവുന്ന ഒരു ഹെയര്‍ സ്റ്റൈലാണ് ഇത്. പോകുന്നിടത്തെല്ലാം ഒരു മതിപ്പ് ലഭിക്കാന്‍ ആഗ്രഹിക്കുന്ന ആർക്കും ഇത് അനുയോജ്യമാണ്. ചെറിയ ലെയറുകള്‍ നല്‍കിയോ മൃദുവായ ചുരുളുകള്‍ സെറ്റ് ചെയ്തോ ഈ രീതി കൂടുതല്‍ മനോഹരമാക്കാം.
