കോട്ടയം: ഏറ്റുമാനൂരില്‍ തന്നെയും മക്കളെയും ഭര്‍ത്താവും ഭര്‍തൃമാതാവും ഉപദ്രവിക്കുന്നു എന്നു പരാതിയുമായി വീട്ടമ്മ. മദ്യത്തിന് അടിമയായ ഭര്‍ത്താവും ഭര്‍തൃമാതാവും ക്രൂരമായി പീഡിപ്പിക്കുന്നുവെന്നാണ് പരാതി.
19-കാരിയായ മകളെയും ഭര്‍ത്താവ് ജോമോന്‍ മര്‍ദ്ദിച്ചെന്ന് കാട്ടി വീട്ടമ്മ ഏറ്റുമാനൂര്‍ പോലീസില്‍ പരാതി നല്‍കിയിട്ടുണ്ട്. നാളുകളായി ഇവര്‍ വിദേശത്തായിരുന്നു ജോലി ചെയ്തിരുന്നത്. തിരികെ വന്നപ്പോള്‍ പ്രശ്നങ്ങള്‍ രൂക്ഷമായെന്നും ഇവര്‍ പറഞ്ഞു. വീട്ടില്‍ വൈദ്യുതി ഉപയോഗിക്കാന്‍ ഭര്‍തൃമാതാവ് സമ്മതിക്കില്ല.
പലപ്പോഴും പ്രശ്നങ്ങള്‍ക്കു തുടക്കമിടുന്നതു ഭര്‍തൃമാതാവായിരിക്കും. അമ്മ പറയുന്ന വാക്കുകേട്ട് ഭര്‍ത്താവ് തന്നെ മര്‍ദിക്കും. നീ ഇവിടെ ജീവിക്കേണ്ടെന്നും പോയി തെണ്ടിത്തിന്ന് എന്നും ഭര്‍തൃമാതാവ് നിരന്തരം പറയാറുണ്ടെന്നും വീട്ടമ്മ പറയുന്നു. മര്‍ദനം സഹിക്കാന്‍ വയ്യാതെയായതൊടെയാണ് പോലീസില്‍ പരാതി നല്‍കിയത്.
ഭര്‍ത്താവിന്റെ മാനസിക പീഡനത്തെത്തുടര്‍ന്നു ഏറ്റുമാനൂരില്‍ രണ്ടു പെണ്‍മക്കളെയുംകൊണ്ട് ഷൈനി ആത്മഹത്യ ചെയ്തതിന്റെ ഞെട്ടല്‍ മാറും മുമ്ബാണ് വീണ്ടും മറ്റൊരു ഗാര്‍ഹിക പീഡന വാര്‍ത്ത കൂടി ഏറ്റുമാനൂരില്‍നിന്നു വരുന്നത്. സംഭവത്തില്‍ പരാതി പരിശോധിച്ചു നടപടി സ്വീകരിക്കുമെന്നു ഏറ്റുമാനൂര്‍ പോലീസ് പറഞ്ഞു.
