തൊടുപുഴ: ഇടുക്കി വണ്ണപ്പുറത്ത് വിൽപനയ്ക്കായി സൂക്ഷിച്ച എംഡിഎംഎയുമായി മൂന്ന് മുസ്ലിം ലീഗ് പ്രവർത്തകർ പൊലീസ് പിടിയിൽ. വണ്ണപ്പുറം സ്വദേശികളായ മുണ്ടുകുന്നേൽ റാഫി, ഷമ്മാസ്, കബീർ എന്നിവരെയാണ് തൊടുപുഴ ഡിവൈഎസ്പി സ്ക്വാഡും കാളിയാർ പൊലീസും സംയുക്തമായി നടത്തിയ നീക്കത്തിൽ കസ്റ്റഡിയിലെടുത്തത്. അറസ്റ്റിലായ പ്രതി റാഫി വണ്ണപ്പുറം ഗ്രാമപഞ്ചായത്തിലെ 16-ാം വാർഡ് അംഗം ഷെമീറയുടെ ഭർത്താവാണ്.

വണ്ണപ്പുറം പള്ളിക്ക് സമീപമുള്ള വാടകവീട് കേന്ദ്രീകരിച്ച് യുവാക്കൾക്കിടയിൽ രാസലഹരി വിൽപനയും ഇടപാടുകളും സജീവമായി നടക്കുന്നുണ്ടെന്ന രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. സംയുക്ത സംഘം വീട് വളഞ്ഞ് നടത്തിയ റെയ്ഡിൽ പ്രതികളിൽ നിന്നായി 1.5 ഗ്രാം എംഡിഎംഎ കണ്ടെടുത്തു. ലഹരിമരുന്ന് എവിടെനിന്നാണ് എത്തിച്ചതെന്നും ഇതിന് പിന്നിൽ മറ്റ് വിതരണക്കാരുണ്ടോയെന്നും കാളിയാർ പൊലീസ് അന്വേഷിച്ചുവരികയാണ്.