ഇന്ത്യൻ സൂപ്പർ ലീ​ഗ് ഫുട്ബോളിൽ കേരള ബ്ലാസ്റ്റേഴ്സിന് വീണ്ടും തോൽവി. കഴിഞ്ഞ മൂന്ന് മത്സരങ്ങളിൽ നിന്നായി രണ്ട് ജയവും ഒരു സമനിലയും നേടി തിരിച്ചവരവിന്റെ സൂചന നൽകിയ ശേഷമാണ് ബ്ലാസ്റ്റേഴ്സ് വീണ്ടും തോൽവി വഴങ്ങിയിരിക്കുന്നത്. ഈസ്റ്റ് ബം​ഗാളിനോട് ഒന്നിനെതിരെ രണ്ട് ​ഗോളുകൾക്കാണ് ബ്ലാസ്റ്റേഴ്സിന്റെ തോൽവി.

വിഷ്ണു പി വിയും ഹിജാസി മഹറും ഈസ്റ്റ് ബംഗാളിനായി ​ഗോളുകൾ നേടി. ഡാനിഷ് ഫാറുഖാണ് ബ്ലാസ്റ്റേഴ്സിനായി വലചലിപ്പിച്ചത്. മത്സരത്തിന്റെ 20-ാം മിനിറ്റിലാണ് ആദ്യ ​ഗോൾ പിറന്നത്. വിഷ്ണു പി വിയുടെ ​ഷോട്ട് ബ്ലാസ്റ്റേഴ്സ് പ്രതിരോധം കടന്ന് വലയിലെത്തി. ബ്ലാസ്റ്റേഴ്സ് താരം കോറൂ സിങ്ങിന് ​ഗോൾ പ്രതിരോധത്തിന് അവസരമുണ്ടായിരുന്നെങ്കിലും സാധിച്ചില്ല. ആദ്യ പകുതിയിൽ എതിരില്ലാത്ത ഒരു​ ​ഗോളിന് മുന്നിൽ നിൽക്കാനും ഈസ്റ്റ് ബം​ഗാളിന് സാധിച്ചു.

രണ്ടാം പകുതിയിൽ 72-ാം മിനിറ്റിൽ ഹിജാസി മഹറിന്റെ ​ഗോൾ പിറന്നു. 84-ാം മിനിറ്റിൽ ഡാനിഷ് ഫാറുഖാണ് ബ്ലാസ്റ്റേഴ്സിനായി ആശ്വാസ ​ഗോൾ നേടിയത്. മത്സരത്തിലെ പരാജയപ്പെട്ടെങ്കിലും പോയിന്റ് ടേബിളിൽ എട്ടാം സ്ഥാനത്ത് തന്നെയാണ് ബ്ലാസ്റ്റേഴ്സ്. 18 മത്സരങ്ങളിൽ നിന്ന് ആറ് ജയവും മൂന്ന് സമനിലയും ഒമ്പത് തോൽവിയുമാണ് ബ്ലാസ്റ്റേഴ്സ് നേടിയത്.