ചികിത്സയ്ക്കായി മുഖ്യമന്ത്രി പിണറായി വിജയൻ വീണ്ടും അമേരിക്കയിലേക്ക് പോകും. വെള്ളിയാഴ്ച ദുബായ് വഴിയാണ് മുഖ്യമന്ത്രി അമേരിക്കയിലേക്ക് പുറപ്പെടുന്നത്. ഒരാഴ്ച നീണ്ടിനിൽക്കുന്ന ചികിത്സയ്ക്കായാണ് മുഖ്യമന്ത്രി അമേരിക്കയിലേക്ക് പുറപ്പെടുന്നത്. യാത്രയുടെ കൂടുതൽ വിശദാംശങ്ങൾ പുറത്തുവിട്ടിട്ടില്ല.
കോട്ടയം മെഡിക്കൽ കോളേജ് ആശുപത്രിയിൽ കെട്ടിടം തകർന്നുവീണ് ഒരാൾ മരിച്ച സാഹചര്യത്തിൽ ആരോഗ്യ മന്ത്രിയുടെ രാജി ആവശ്യപ്പെട്ട് സംസ്ഥാനവ്യാപക പ്രക്ഷോഭം നടക്കുന്നതിനിടയിലാണ് മുഖ്യമന്ത്രി ചികിത്സയ്ക്കായി പുറപ്പെടുന്നത്. മെഡിക്കൽ കോളേജിലുണ്ടായ അപകടത്തിൽ മുഖ്യമന്ത്രി ഇതുവരെ പ്രതികരിച്ചിട്ടില്ല.
നേരത്തെ വ്യാഴാഴ്ച അപകടം ഉണ്ടായ കോട്ടയം മെഡിക്കൽ കോളേജിൽ മുഖ്യമന്ത്രി സന്ദർശനം നടത്തിയിരുന്നു. മിനിറ്റുകൾ മാത്രം നീണ്ടുനിന്നതായിരുന്നു മുഖ്യമന്ത്രിയുടെ സന്ദർശനം. അപകടം ഉണ്ടായ സ്ഥലത്തേക്ക് പോയില്ല. മാധ്യമങ്ങളോട് പ്രതികരിച്ചില്ല. പറയാൻ ഒന്നുമില്ലെന്നും എല്ലാം മന്ത്രിമാർ പറഞ്ഞെന്നുമായിരുന്നു മാധ്യമപ്രവർത്തകരുടെ ചോദ്യങ്ങളോടുള്ള മുഖ്യമന്ത്രിയുടെ മറുപടി.
