ഏതൊരാളും ജീവിതത്തില്‍ എപ്പോഴെങ്കിലും മെഡിക്കല്‍ എമര്‍ജന്‍സിയെ അഭിമുഖീകരിക്കേണ്ടി വന്നേക്കാം എന്ന ചിന്തയോടെ മുന്‍കരുതല്‍ നടപടി സ്വീകരിക്കുന്നത് നല്ലതാണ്. അപ്രതീക്ഷിതമായി ആശുപത്രിയിലാവുമ്പോള്‍ കൈയില്‍ ആവശ്യത്തിന് പണം ഉണ്ടാവണമെന്നില്ല. പിന്നീട് പണത്തിനായുള്ള നെട്ടോട്ടമായിരിക്കും. ഇത് മുന്‍കൂട്ടി കണ്ട് ഹെല്‍ത്ത് ഇന്‍ഷുറന്‍സ് എടുക്കുന്നവരുടെ എണ്ണം വര്‍ധിച്ചുവരികയാണ്. ഇത്തരത്തില്‍ ആകസ്മികമായി വരുന്ന ചെലവുകള്‍ കൈകാര്യം ചെയ്യാന്‍ കഴിയുമെന്ന വിശ്വാസത്തിലാണ് ഹെല്‍ത്ത് ഇന്‍ഷുറന്‍സ് പോളിസികള്‍ എടുക്കുന്നത്. ആശുപത്രി ചെലവുകള്‍ കവര്‍ ചെയ്യും എന്നതാണ് ഹെല്‍ത്ത് ഇന്‍ഷുറന്‍സിന്റെ ഡിമാന്‍ഡ് വര്‍ധിപ്പിക്കുന്നത്.

വാര്‍ഷികാടിസ്ഥാനത്തിലും മാസംതോറും പ്രീമിയം അടയ്ക്കാവുന്ന തരത്തില്‍ നിരവധി ഹെല്‍ത്ത് ഇന്‍ഷുറന്‍സ് പോളിസികള്‍ വിപണിയിലുണ്ട്. ഒപി ചെലവ് വരെ കവര്‍ ചെയ്യാവുന്ന തരത്തില്‍ വ്യത്യസ്തമായ ഇന്‍ഷുറന്‍സ് പോളിസികളാണ് ഉള്ളത്. ഒരാളുടെ ആവശ്യത്തിന് അനുസരിച്ച് തെരഞ്ഞെടുക്കാന്‍ കഴിയുന്നവിധം വ്യത്യസ്ത തരത്തിലുള്ള പോളിസികള്‍ ലഭ്യമാണ്. ആകസ്മികമായി വരുന്ന ചെലവുകളെ ഓര്‍ത്ത് ഉണ്ടാവാനിടയുള്ള മാനസിക സംഘര്‍ഷം ലഘൂകരിക്കാനും ഹെല്‍ത്ത് ഇന്‍ഷുറന്‍സ് വഴി സാധിക്കും.

ഹെല്‍ത്ത് ഇന്‍ഷുറന്‍സ് എടുക്കുന്നതിന് മുന്‍പ് ശ്രദ്ധിക്കേണ്ട ഒന്‍പത് കാര്യങ്ങള്‍ ചുവടെ:

1. ഇന്‍ഷുറന്‍സ് പോളിസി എന്തെല്ലാം കവര്‍ ചെയ്യുമെന്ന് മനസിലാക്കണം. ഹോസ്പിറ്റലൈസേഷന്‍, ഹോസ്പിറ്റലൈസേഷന് മുമ്പും ശേഷവുമുള്ള ചെലവുകള്‍, ഗുരുതരമായ അസുഖങ്ങള്‍ തുടങ്ങിയവ കവര്‍ ചെയ്യുന്ന പോളിസിയാണോ എന്ന് പരിശോധിക്കണം. സമഗ്രമായ കവറേജ് പോളിസിയാണ് നല്ലത്.

2.കാഷ് ലെസ് ചികിത്സ ലഭ്യമാക്കാന്‍ കഴിയുന്ന ആശുപത്രികളുടെ വിശാലമായ നെറ്റ് വര്‍ക്കുള്ള ഇന്‍ഷുറന്‍സ് കമ്പനികളെ തെരയുക. ഇത് അടിയന്തര ഘട്ടങ്ങളില്‍ സാമ്പത്തിക ഭാരം കുറയ്ക്കുകയും ക്ലെയിം പ്രക്രിയ ലളിതമാക്കുകയും ചെയ്യും.

വ്യത്യസ്ത പോളിസികളുടെ പ്രീമിയങ്ങള്‍ താരതമ്യം ചെയ്യുക. ഏറ്റവും കുറഞ്ഞ വിലയെ മാത്രം അടിസ്ഥാനമാക്കി പോളിസി തെരഞ്ഞെടുക്കരുത്. പണത്തിന് നല്ല മൂല്യം ലഭിക്കുന്നുണ്ടെന്ന് ഉറപ്പാക്കാന്‍ പ്രീമിയവുമായി ബന്ധപ്പെട്ട കവറേജും ആനുകൂല്യങ്ങളും പരിഗണിക്കണം.

4.ആരോഗ്യ ഇന്‍ഷുറന്‍സ് പോളിസികള്‍ക്ക് പലപ്പോഴും വെയ്റ്റിങ് പീരീഡ് ഉണ്ടാവാറുണ്ട്. ചില പ്രത്യേക രോഗങ്ങള്‍, മുന്‍പ് നിലനിന്നിരുന്ന അവസ്ഥകള്‍ എന്നിവയെല്ലാം അടിസ്ഥാനമാക്കിയാണ് വെയ്റ്റിങ് പീരീഡ് നിശ്ചയിക്കുന്നത്. വെയ്റ്റിങ് പീരീഡ് പരിശോധിച്ച് കുറഞ്ഞ ദൈര്‍ഘ്യമുള്ള ഒരു പോളിസി തെരഞ്ഞെടുക്കാന്‍ ശ്രമിക്കുക.

ഉയര്‍ന്ന ക്ലെയിം സെറ്റില്‍മെന്റ് അനുപാതം, പെട്ടെന്ന് ക്ലെയിം പ്രോസസ് ചെയ്ത് പണം നല്‍കുന്നതില്‍ നല്ല ട്രാക്ക് റെക്കോര്‍ഡ്, എന്നിവയുള്ള ഇന്‍ഷുറന്‍സ് കമ്പനികള്‍ തെരഞ്ഞെടുക്കുന്നതാണ് നല്ലത്

6. പോളിസിയില്‍ ഉള്‍പ്പെടാത്തത് എന്താണെന്ന് മനസ്സിലാക്കാന്‍ പോളിസി നന്നായി വായിക്കുക. പോളിസിയില്‍ ഉള്‍പ്പെടാത്തത് മുന്‍കൂട്ടി അറിയുന്നത് ഒരു ക്ലെയിം ഫയല്‍ ചെയ്യുമ്പോള്‍ ഉണ്ടാകുന്ന ബുദ്ധിമുട്ടുകള്‍ ഒഴിവാക്കാന്‍ സഹായിക്കും.

7.ലൈഫ് ടൈം റിന്യൂബിലിറ്റി വാഗ്ദാനം ചെയ്യുന്ന പോളിസികള്‍ തെരഞ്ഞെടുക്കുക. പിന്നീട് ജീവിതത്തില്‍ ഒരു പുതിയ പോളിസി വാങ്ങേണ്ട ആവശ്യമില്ലാതെ, പ്രായമാകുമ്പോള്‍ പരിരക്ഷയില്‍ തുടരുമെന്ന് ഇതുവഴി ഉറപ്പാക്കാന്‍ സാധിക്കും.

മെറ്റേണിറ്റി കവറേജ്, ഗുരുതരമായ രോഗ റൈഡറുകള്‍, ഗ്യാരണ്ടീഡ് ഡെയ്‌ലി ക്യാഷ് ബെനിഫിറ്റ്, വ്യക്തിഗത അപകട പരിരക്ഷ എന്നിവ പോലുള്ള അധിക ആനുകൂല്യങ്ങള്‍ പരിഗണിക്കുക. നിര്‍ദ്ദിഷ്ട ആവശ്യങ്ങള്‍ക്കനുസരിച്ച് ഈ ആഡ്-ഓണുകള്‍ക്ക് പോളിസിയുടെ കവറേജ് വര്‍ദ്ധിപ്പിക്കാന്‍ കഴിയും.

9. ചില പോളിസികള്‍ക്ക് റൂം വാടക, നിര്‍ദ്ദിഷ്ട ചികിത്സകള്‍ അല്ലെങ്കില്‍ കോ-പേയ്മെന്റ് ക്ലോസുകള്‍ എന്നിവയില്‍ പരിധികളുണ്ട്. ഇന്‍ഷ്വര്‍ ചെയ്തയാള്‍ ചെലവിന്റെ ഒരു ഭാഗം വഹിക്കണം. അപ്രതീക്ഷിത ചെലവുകള്‍ ഒഴിവാക്കാന്‍ ഈ നിബന്ധനകള്‍ മനസ്സിലാക്കുക.