കൊച്ചി: പി.സി ജോര്‍ജിന്റെ ജാമ്യം റദ്ദാക്കണമെന്ന് ആവശ്യപ്പെട്ട് സര്‍ക്കാര്‍ ഹൈക്കോടതിയില്‍. പി.സി ജോര്‍ജ് കോടതിയുടെ ജാമ്യവ്യവസ്ഥ നിരന്തരം ലംഘിക്കുകയാണെന്ന് ചൂണ്ടിക്കാട്ടിയാണ് സര്‍ക്കാരിന്റെ അപേക്ഷ. മതസ്പര്‍ദ്ധയുണ്ടാക്കും വിധം സംസാരിച്ചതിന് പാലാരിവട്ടം പൊലീസ് എടുത്ത കേസില്‍ ജോര്‍ജിന് നേരത്തെ ജാമ്യം അനുവദിച്ചിരുന്നു.
സമാന കുറ്റകൃത്യം ആവര്‍ത്തിച്ചാല്‍ ജാമ്യം റദ്ദാക്കുമെന്ന് കോടതി വ്യവസ്ഥ വച്ചിരുന്നു. ജനുവരിയില്‍ ഈരാറ്റുപേട്ടയില്‍ സമാന കുറ്റകൃത്യം ജോര്‍ജ് ആവര്‍ത്തിച്ചെന്നും അതില്‍ കേസെടുത്തിട്ടുണ്ടെന്നും പൊലീസ് കോടതിയെ അറിയിച്ചു. 2022 ല്‍ രജിസ്റ്റര്‍ ചെയ്ത പാലാരിവട്ടം കേസില്‍ ജോര്‍ജിന്റെ ജാമ്യം റദ്ദാക്കണമെന്നാണ് സര്‍ക്കാര്‍ ആവശ്യം.
ജനുവരിയില്‍ ചാനല്‍ ചര്‍ച്ചയില്‍ പി.സി ജോര്‍ജ് നടത്തിയ പരാമര്‍ശത്തിനെതിരെയാണ് ഈരാറ്റുപേട്ട പൊലീസ് കേസെടുത്തത്. മതസ്പര്‍ധ വളര്‍ത്തല്‍, കലാപാഹ്വാനം തുടങ്ങിയ വകുപ്പുകളാണ് ചുമത്തിയിരിക്കുന്നത്. ചര്‍ച്ചക്കിടെ പി.സി ജോര്‍ജ് മുസ്ലിം വിരുദ്ധ പരാമര്‍ശങ്ങള്‍ നടത്തിയെന്നാണ് പരാതി.
