കണ്ണൂർ: കുടുംബ പ്രശ്നത്തിന്റെ പേരിൽ ഭർതൃ സഹോദരൻ മണ്ണെണ്ണയൊഴിച്ച് തീകൊളുത്തിയ യുവതി മരിച്ചു. കണ്ണൂർ പാട്യം പത്താക്കുന്നിലെ സുബിനയാണ് മരിച്ചത്. ഇവരുടെ ഭർത്താവ് രജീഷ് ഗുരുതരാവസ്ഥയിൽ ചികിത്സയിൽ തുടരുന്നു. കുടുംബാംഗങ്ങളെ തീ കൊളുത്തിയതിനു പിന്നാലെ രജീഷിന്റെ സഹോദരൻ രഞ്ജിത്ത് (47) ജീവനൊടുക്കി.

ഇന്നലെ രാത്രി ഏഴ് മണിയോടെയാണ് നടുക്കുന്ന സംഭവങ്ങൾ. വീട്ടിലെത്തിയ രഞ്ജിത്ത് മണ്ണെണ്ണ ഒഴിച്ച് രജീഷിനേയും സുബിനയേയും തീ കൊളുത്തുകയായിരുന്നു. രജീഷും സുബിനയും ഇവരുടെ മകനും ഭക്ഷണം കഴിച്ചുകൊണ്ടിരിക്കുന്നതിനിടെയാണ് ആക്രമണം. ഇവരെ രക്ഷിക്കാൻ ശ്രമിക്കുന്നതിനിടെ രജീഷിന്റെ മകനും പൊള്ളലേറ്റു.

സംഭവം നടക്കുമ്പോൾ ഇവരുടെ അമ്മ നളിനിയും വീട്ടിലുണ്ടായിരുന്നു.ആക്രമണം നടത്തിയ ശേഷം രഞ്ജിത്തിനെ കാണാതായിരുന്നു. പിന്നാലെ കിടപ്പു മുറിയിൽ തൂങ്ങി മരിച്ച നിലയിൽ കണ്ടെത്തുകയായിരുന്നു.പൊള്ളലേറ്റ രജീഷിനേയും മകനേയും കോഴിക്കോട് മെഡിക്കൽ കോളജിൽ പ്രവേശിപ്പിച്ചു. വീട്ടിൽ സഹോദരങ്ങൾ തമ്മിൽ തർക്കമുണ്ടായിരുന്നുവെന്നു നാട്ടുകാർ വ്യക്തമാക്കി.