കോട്ടയം : സംസ്ഥാനത്ത് അതിശക്തമായ മഴയ്ക്ക് സാധ്യത. കനത്ത മഴ കണക്കിലെടുത്ത് മൂന്നുദിവസം കോട്ടയം ജില്ലയിൽ ഓറഞ്ച് അലർട്ട് പ്രഖ്യാപിച്ചു. ജൂലൈ 3,4,5 തീയതികളിൽ കേന്ദ്ര കാലാവസ്ഥാ വകുപ്പ് ഓറഞ്ച് പ്രഖ്യാപിച്ചതായി ജില്ലാ കളക്ടർ വി വിഗ്നേശ്വരി അറിയിച്ചു.
പൊതുജനങ്ങൾ ജാഗ്രത പാലിക്കണമെന്നും നിർദ്ദേശത്തിൽ പറയുന്നു.

ജില്ലയിൽ രാവിലെ മുതൽ തന്നെ കനത്ത മഴയാണ്. ഇന്ന് ഉച്ചയോടെ പാമ്പാടി സെൻറ് ജോൺസ് പള്ളി സെമിത്തേരിയുടെ മതിൽ ഇടിഞ്ഞുവീണു . വർഷങ്ങൾ പഴക്കംചെന്ന മതിൽ റോഡിലേക്ക് ഇടിഞ്ഞു വീഴുകയായിരുന്നു. ഈ സമയം വാഹനങ്ങളോ മറ്റ് യാത്രക്കാരോ എത്താഞ്ഞതിനാൽ വൻ അപകടം ഒഴിവായി.

അതേസമയം ഇന്നലെ ഉച്ചയോടെ കോട്ടയം മെഡിക്കൽ കോളേജ് ആശുപത്രി കോമ്പൗണ്ടിൽ പാർക്ക് ചെയ്തിരുന്ന വാഹനങ്ങൾക്ക് മുകളിലേക്ക് മരം ഒടിഞ്ഞു വീണു. തേക്ക് മരത്തിന്റെ ശിഖരങ്ങളാണ് പാർക്ക് ചെയ്തിരുന്ന കാറിന്റെയും ഓട്ടോറിക്ഷയുടെ മുകളിലേക്ക് വീണത്. ആർക്കും പരിക്കില്ല.